يا بلد اصبحت كيف؟؟
وكيف عيونك من وجع سهر الليالي
الحائرة في الصيف والخريف
تسلم انت ..
من المصاعب.. والمتاعب
والجراحات والنزيف
اصبحتا كيف؟؟
اصبحتا كيف؟؟
وكيف اصبح النيل.. والنخيل
والبراحات.. والتلال
وكيف اصبحنا عزة في هواك
والسمرة والناس الطوال
وكيف نامت امدرمان هناك؟؟
والكورة كان مريخ هلال
وجمهورك الواعي وحصيف
اصبحتا كيف؟؟
وانا في وراك
متوسدك صدر وجناح
اصبحتا كيف؟؟ وانا في حماك
متوسمك.. لمسة وفا
وساعة صفا..وبلسم جراح
واصبحتا كيف؟؟ وانا في رجاك
مستلهمك.. طلة ندي
وبسمة رضا.. ونجمة صباح
في حضنك الزاهي الوريف
اصبحت كيف؟؟
تسلم انت من المصاعب..
والجراحات.. والنزيف
•
د. عمر محمود خالد